सालबारि,अक्ट’बर,18:बाक्सा जिलानि गोदान बरला गाउनि थागिबि मोनसे समनि बयजोंबो अनसायजानाय जौसांनि फावखुंगुर,नाटक दिन्थिगिरि,नाटक डाइरेक्टर हेमेन शर्माया थांनाय 15 अक्ट’बरनि मोनायाव गोदान बरला गाउनि गावनि न’आव बोराय जानायनि जाहोनाव 87 बोसोर बैसोआव रुंसारि जायो।
1938 माइथायाव जोनोम मोन्नाय हेमेन शर्माया मोनसे समनि गुणगोनां फोरोंगिरि हर बल्लभ शर्मा आरो मक्षदा देबीनि सेथि फिसाज्लामोन।उन्दै समनिफ्रायनो फाव खालामनायनि फार्से गोसो गुदुं जानानै उननि समाव सासे बयजोंबो अनसायजानाय जौसांनि महरगिरि हिसाबै बिमुं मोन्नो हादोंमोन।जर’खायै एदावनाय आखुआव गोख्रों फाव खालामनानै जौसां मुलुगाव बियो मोनसे आलादा सिनायथि होनो हादोंमोन।1969 माइथायाव फिन गिबि खेबनि थाखाय भ्रम्यमान थियेटारनि जनक अच्युत लहकरनि नटराज थियेटाराव बेउला नाटकाव फाव खालामनानै जागायजेनदोंमोन महरगिरिनि फाव खालामनाय जिउआ।उनाव “आसाम ष्टार” थियेटारनि अनगायैबो गुबुन गुबुन नाटक हान्जायावबो हाबनानै गुबुन गुबुन आखुआव फाव खालामनानै नायगिरिफोरखौ गोसो बोनो हादोंमोन।मोनसे समनि नाटक मोजां मोनग्रा कृष्णमल्ल बरुवा आरो भ्राम्यमान थियेटारनि बिबानगिरि अच्युत लहकरनि थुलुंगायाव रनसायनाय गिबिसिन गुदि नाटक “दुलचन्दन” जौसांआव दिन्थिनाय जादोंमोन बै समाव आसामनि गाहाय नाटक हान्जा “रुपालिम थियेटार”आव।बेनि उनाव फारि फारियै रनसायदोंमोन “महायुद्धर घड़ा”,पबित्र गंगा,बेलि-आबेलि आरो आईजनी बायदि नाटक।
नाटक रनसायनायनि अनगायैबो भ्राम्यमान थियेटारनि माखासे नाटक डाइरेक्सनबो खालामदोंमोन।फावखुंगुरा गुवाहाटी दुरदर्शननि जोहै मोनसे समाव ब्रडकास्ट सिरियेल फारियै सन्धान,सुर्यमुखीर स्वप्न बायदियावबो गोख्रों फाव खालामदोंमोन।बेनि अनगायैबो टेलिफिल्म “हथात एदिन”,”नाम्बार प्लेट” बायदियावबो फाव खालामनानै नायगिरिफोरनिफ्राय जोबोद रायखांजानो हादोंमोन।आसाम सरकारनि महरगिरि फेन्सन मोनगिरि महरगिरि सासे सालबारि महकुमा प्रशासन,बङाइगाउ सोदांसालि जिरायनाय मिरु,आसाम साहित्य सभानि बावैसोयै थुंगेनाय पाठशाला जथुम्मा बायदि बायदि फसंथानफोरनि जोहै बरायनाय जादोंमोन।
शिबसागरनि नर्थ इष्ट सांस्कृतिक गष्ठीया होदोंमोन जीबनजरा साधना बान्था।थैनाय समाव बिनि बिसिनि अनगायैबो सानै फिसाज्ला,बिहामजो,सासे फिसाजो,बिजामादै,फिसौज्ला-फिसौजो लोगोसे गोबां मददगिरिफोरखौ बे संसाराव नागारलाङो।बयजोंबो अनसायजानाय महरगिरि सासे रुंसारि जानायाव राज्योनि महरगिरि समाजनि अनगायैबो गासै बाक्सा आरो बजालि जिलायाव दुखुआ साग्लोबदों।
About the Author
